BAGUIO CITY – Inaklon ti ama ti Baguio nga am-amuenda paylaeng ti pudno a sitwasyon ti siudad iti benneg dagiti naimpeksion iti COVID-19.
Iti eksklusibo nga interview ti Bombo Radyo Baguio kenni Mayor Benjamin Magalong, inlawlawagna a daytoy ket gaputa awan pay ti naisaysayangkat a pudpudno a mass testing gapu iti kinakurang ti test kits para iti siudad.
Kinunana a ti agarup 8,100 a COVID test kits ti DOH-Cordillera para iti entero nga amianan a Luzon ket saan nga umdas no idilig iti popolasyon dagiti rehion a mangbukbukel iti amianan a Luzon.
Gapu iti daytoy, dinakamatna nga ikagkagumaan ti lokal a gobyerno ti Baguio nga agbiruk iti rapid test kits para iti contact tracing activities dagiti naaddaan ti COVID-19 kas iti panagkiddawda iti donasyon para iti nasao a test kit.
Inaklon pay ti mayor a gapu iti nasao a sitwasyon ket saan a makagaraw ti siudad iti puntiryada a kapartak ti panakaipasidong dagiti umili iti mass testing iti COVID-19.
Kabayatanna, imbingayna a napintas met ti panagimbag dagiti lima nga aktibo a kaso ti COVID-19 iti Baguio General Hospital and Medical Center (BGHMC) ken nainget ti panangtutukda kadagitoy nangruna iti maysa a pasyente a 26 nga aldawen nga adda iti ospital ngem agingga ita ket saan paylaeng a nagnegatibo iti coronavirus.
Dinakamatna a nagaramiden ti BGHMC kadagiti baro a pagaladagan tapnu maipasigurado nga awanen kadagiti medical frontliners daytoy ti agpositibo iti COVID-19 kalpasan a dua a nars ti ospital ti naakaran iti nasao a sakit.
