BAGUIO CITY – Agtaltalinaed a natalged dagiti Filipinos nga agnanaed ken agtatrabaho sadiay pagilian nga Ecuador iti South America iti baet ti lockdown sadiay gapu iti COVID-19 pandemic.
Iti interview ti Bombo Radyo Baguio kenni Agnes Raflores, manager ti maysa a restaurant sadiay Guayaquil, Ecuador ken tubo ti Luisiana, Laguna, kinunana a bassit laeng dagiti Pinoy sadiay a dumanon iti 150.
Kinunana nga apektado met dagiti Pinoy sadiay gapu iti panagsardeng ti trabaho ken panagrikep dagiti negosyo sadiay ngem ikagkagumaanda latta ti agka-kwarta babaen iti panaglutoda kadagiti makan nga ididiaya wenno ilaklakoda iti online.
Imbingayna a nakalukat ti imatmatonna a restuarant ti kabsatna ngem para laeng iti take-out gaputa maipawil ti dine-in.
Pagyamyaman met ti Filipino Community sadiay ti kaawan dagiti Pinoy a nakaptan ti COVID sadiay Ecuador.
VC RAFLORES 1
Kabayatanna, imbingay ni Raflores nga iti ayanda a Guayaquil ti sentro ti epidemya ti COVID-19 sadiay Ecuador.
Sigun kenkuana, saan a napakadaan ti gobyerno ti Ecuador ken dagiti ospital sadiay ti killaat a panagadu ti kaso a nagresulta iti panakaikabil dagiti bangkay kadagiti kalsada sadiay.
Maibasar iti kaudian a datus, agarup iti 9,500 ti positibo a kaso ti COVID sadiay Ecuador nga addaan ti 474 nga ipupusay ken nasurok 1,000 a panagimbag.
Inaklon pay ni Raflores a pangato paylaeng ti kaso ti COVID-19 sadiay isut gapuna a nainget ti implementasyon ita kadagiti paglintegan kas iti social distancing ken iti panagisuot iti facemask no rumwar iti balay.
Naamuan nga isagsaganan ti gobyerno ti Ecuador ti maysa a “camp for the dead” sadiay kas aksion iti umad-ado a bilang dagiti bangkay a nabalkot iti napuskol a plastik, karton a nagkabilan ti prutas ken iti kayo a lungon a maibatbati kadagiti kalkalsada, cargo trailers ken parking lots.
