BAGUIO CITY – Maipaspasidongen iti panagsanay ti sibubukel a pwersa ti Baguio General Hospital and Medical Center (BGHMC) kas panagsagana iti posibilidad nga umado pay dagiti COVID patients sadiay.
Sigun kenni Dr. Ricardo Ruñez Jr., Medical Center Chief ti BGHMC, adda ti nasurok 400 a doktor ken nasurok a 600 a nars a nakasagana a mangasikaso kadagiti agbalinto pay a COVID patient.
Nupay kasta, kinunana nga ita ket dagiti fully-trained a medical personnel dagitoy ti inisyal a nadutukan a mangasikaso kadagiti agdama a COVID patients ti BGHMC.
Innayonna nga adda metlaeng dagiti katulonganda a volunteer doctors ken nurses a mangas-asikaso kadagiti pasyente nga adda ita iti quarantine facility ti Baguio.
Dinakamat pay ni Dr, Ruñez nga ipatungpalda ti pacing, decking ken spacing iti panangisimpada iti schedule dagiti nasao a frontliners tapnu maipanamnama ti agtultuloy operasyon dagitoy ken tapnu maipasigurado a saan a marigatan dagiti maseknan a frontliners.
Kinunana a babaen iti panakaisimpa ti schedule dagiti frontliners ket maipaayan dagitoy iti gundaway a makainana tapnu saanda a mabannog unay, saan a kumapoy ti immune system-da ken saanda nga agbalin a vulnerable iti virus.
