BAGUIO CITY – Agtultuloy ti koordinasyon ti City Disaster Risk Reduction Management Office (CDRRMO) kadagiti babbarangay iti Baguio City kas panagsaganda iti panawen ti panagtutudo wenno iti aniaman a panakapasamak ti kalamidad.
Iti interview ti Bombo Radyo Baguio kenni DRRM Officer Louie Glenn Lardizabal, kinuna nga kanayun ti pakdaar ken palagipda kadagiti babarangay wenno komunidad kadagiti panag-aksion kabayatan dagiti kalamidad.
Sigun kenkuana, nangipaayda ken ti lokal a gobierno iti response equipments kadagiti babbarangay malaksid pay iti aktibidad ken panagsanay a siguden a maipatpatungpal kadagiti komite ti Local DRRM iti tunggal barangay.
Manarimaan pay ti koordinasyonda iti City Social Welfare and Development(CSWDO) para iti panakaimanahinar dagiti evacuation centers.
Imbinglayna nga amin a barangay iti siudad ket nangbigbig ti evacuation centers-da a kadawyan ket dagiti multipurpose hall wenno day care center bayat dagiti pagadalan iti masakopanda ti maaramat nu kasapulan.
Inayonna met a kanayun a nakasagana ti model evacuation center ti siudad ken dagiti modular tents malaksid iti plano ti siudad a mapasayaat pay ti evacuation centers dagiti nagduduma a barangay iti siudad.
