ITOGON, BENGUET- Kidkiddawen ni Cyril Batcagan, dadaulo iti Municipal Disaster Risk Reduction and Management Office (MDRRMO) Itogon, Benguet, kadagiti umili sadiay a kasapulan iti pannakitinulong ken kopperasyon dagitoy para iti panagsaganada iti manamnama nga epekto ti La Niña Phenomenon.
Iti pannakiuman ti Bombo Radyo kenkuana, kinuna a kasapulan ti naan-anay a panagsaganada dagitoy agsipud ta naikarga iti intero nga Itogon kas landslide prone area gapu iti kinakurang dagiti kaykayo sadiay.
Gapu iti daytoy, kinuna a no mabalin ket suruten dagiti agpangpanggep nga agpatakder iti pagtaenganda ti formation ti bantay tapno saan a mapatad daytoy tapno maliklikan ti panaglayos.
Maibasar iti obserbasyon dagitoy, dagiti prone area ket pakairamanan iti barangay Ucab, Loakan, Tuding ken iti barangay Gumatdang.
Kabayatanna, kidkiddawen pay ni Cyrill kadagiti umili a saan dagitoy a pullatan dagiti drainage kanal tapno maliklikan iti panaglayos bayat ti panagtutudo.
Nagballaag metlaeng daytoy kadagiti minero tapno liklikanda nga umintra bayat a napigsa ti tudo agsipud ta narigso unay daytoy.
