BAGUIO CITY — Sinuspendir ni Baguio City Mayor Domogan ti serrek ti klase dagiti estudyante iti elementarya ken sekondarya, iti pribado ken parapubliko a pagadalan inton Pebrero a uno.
Maibasar iti Administrative Order No. 10 series of 2018 nga impaulog ti mayor, daytoy ket tapno maipaayan dalan ti panaglukat wenno ti grand opening parade ti maikaduapulo ket tallo nga edisyon ti Panagbenga wenno ti Baguio Flower Festival.
Namnamaen ti mayor a babaen iti nasao a panakasuspendir ti klase ket maaddaan iti gundaway dagiti estudyante iti elementarya ken sekodnarya a makipaset iti napateg nga okasyon nga addaan tema a “Celebreation of Culture and Creativity.”
Maipalagip a nakasaganan dagiti nagduduma nga aktibidad iti Panagbenga 2018 a mangrugi inton Pebrero a uno agingga Marso.
Tampok ti okasyon ti Grand Street Dance Parade a maipatungpal inton Pebrero 24 ken ti Grand Float Parade inton Pebrero 25.
