BAGUIO CITY – Tumulong nga agbantay iti merkado publiko dagiti porters wenno komboy para iti panagpatalinaed iti linak ken kapia sadiay.
Sigun kenni Marvin Binay-an, senior staff ni Councilor Leandro Yangot, iti naangay a market summit dagitoy idi napalabas a lawas ket napagnunumuanda a karaman dagiti komboy nga agbantay tapnu maliklikan ti panagraira dagiti snatcher ken holdaper iti city market.
Kinunana nga adda met ti programa ni Yangot a nu adda man ti matiliw dagiti komboy nga snatcher wenno managdakdakes ket maipaayanda iti cash reward a sangaribo a pisos kas panangbigbig met iti kinatured dagitoy.
Innayuna a malaksid iti dayta ket nakikoordinarda metten iti Baguio City Police Office tapnu maingetan pay ti panagbantay dagitoy iti merkado publiko nangruna iti rabii.
Kinunana pay a makikoordinarda metlaeng kadagiti barangay officials tapnu mangdutukda iti kakadwada a kameng ti Barangay Peace Keeping Corps [cor] nga agbantay sadiay nangruna iti deppaar ti Kayang street, Magsaysay ken Malcolm Square.
Inlawlawagna met a saan nga obligado dagiti komboy a mangkemmeg kadagiti snatcher gaputa adda dagiti dadduma a mabuteng nga agtiliw ta amangan nu agbales dagiti tiliwenda.
Impettengna met a ti sangaribo a pisos nga ipaay ni Yangot ket agtaud iti bukod daytoy a bulsa.
