BAGUIO CITY – Pagbotosan ti Private-Public Partnership (PPP) Committee ti lokal a konseho ti Baguio inton bigat, August 5 no asino kadagiti dua a dadakkel a kompanya ti pakaipaayan ti Original Proponent Status (OPS) para iti rehabilitasyon ti Baguio City Public Market.
Iti interview ti Bombo Radyo Baguio kenni City Administrator Engr. Bonifacio Dela Peña, inlawlawagna a saan a garantiya ti maited nga OPS para iti pinal a partnership ti lokal a gobierno ti Baguio ken ti mapili a kompanya.
Kinunana a maysa laeng daytoy a proseso iti PPP a wagas ti rehabilitasyon ti merkado publiko.
Inyuna-unayna a kalpasan a maipaay ti OPS ket sumaruno ti negosasyon nga agapaut iti maysa ket kagudua a bulan.
Kinunana a ditoy a matalantan dagiti probisyon ken kondisyon ti lokal a gobyerno ti Baguio iti implementasion ti rehabilistasyon iti merkado.
Dinakamatna metlang nga adda ti karbengan ti lokal a gobyerno ti Baguio a mangwaswas wenno mangipasardeng iti negosasyon iti kanito a saan a matungpal ti interesado a kompanya dagiti maituding a kondisyon.
Inaklon pay ni Dela Peña nga atiddog pay ti pagdalanan ti nasao a proyekto gaputa dumalan pay daytoy iti 19 a proseso sakbay a maipinal babaen iti mapirmaan a kontrata.
Maipalagip a nangabak iti lokal a konseho ti Baguio ti PPP a wagas ti rehabilitasyon iti merkado publiko ken tallo a kompanya ken kooperatiba ti nangisumitir iti proposal dagitoy.
Nupay kasta, saan nga inawat ti konseho ti proposal ti maysa a kompanya gapu iti kinakurang ti dokumento. (Bombo Roji Mae Lorenzo-Santiago)
