BAGUIO CITY – Nakemmeg ti maysa a konsehal ti Pasil, Kalinga iti naipatungpal a drug buy-bust operation kontra kenkuana sadiay Dagupan, Tabuk City, Kalinga idi kalman.
Nabigbig daytoy a ni Dexter Gayawet Batalao, 31-anyos ken temporaryo nga agnanaed sadiay Pantal Brookside, Bulanao, Tabuk City, Kalinga.
Maibasar iti report, nangisayangkat iti operasyon ti nagtitipon a pwersa dagiti otoridad kontra iti nasao nga opisyal gapu iti koneksion daytoy iti iligal a droga.
Kabayatan ti operasyon ket nadlaw ti suspek nga otoridad dagiti katransaksyonna isut gapuna a dagus a naglibas babaen iti luganna ken imetna ti P1,000 a buy bust money.
Nupay kasta, natiliw daytoy iti checkpoint sadiay Appas, Tabuk City ken sadiay a nakumpiskar kenkuana ti buy-bust money ken maysa a sachet ti mapapati a shabu.
Nakumpiskar pay manipud iti lugan ti konsehal ti maysa a machine pistol nga addaan ti magazine ken silencer accessory, innem a bala ti caliber 45, 44 a bala ti caliber 9mm ken drug paraphernalias.
Kalpasan ti panakakemmeg ti konsehal ket inserbida ti search warrant iti pagnanaedan daytoy sadiay Pantal Brookside a nangkumpiskaranda iti uppat a sachet ti mapapati a shabu, drug paraphernalias ken adu a bala.
Naamuan nga immunan a simmuko iti Oplan Tokhang ni Batalao idi 2016 ngem saan daytoy a simmardeng iti iligal nga aramid isut gapuna a naibilang daytoy a high value target.
Sumangsango ita ti konsehal iti kaso a panaglabsing iti RA 9165 wenno ti Comprehensive Dangerous Drugs Act of 2002 ken iti RA 10591 wenno ti Comprehensive Law on Firearms and Ammunition.
