BAGUIO CITY – Maitultuloyen ti konstruksion ti Community Business Center iti sentro ti La Trinidad Vegetable Trading Post kalpasan a naisardeng ti konstruksion idi napalabas a tawen gapu iti kinakurang ti pondo.
Sigun kenni Mayor Romeo Salda, maar-aramat ita ti P10.5-M a pondo a naawatda manipud iti Central Office ti Department of Agriculture (DA).
Kinunana nga ita laeng a maaramat ti pondo kalpasan a naipaluspos idi Marso gaputa adda pay ti naipatungpal a bidding ken ti nangabak ket ti sigud a kontraktor a nangirugi iti proyekto.
Dinakamatna a ti P10.5-M ket maaramat para iti panakaipasdek ti umuna a kadsaaran ti business center ken no adda pay mabati ket marugian ti maikadua a kadsaaran.
Innayonna a nagkiddawda manen iti kanayonan a P5-M manipud iti DA-Central Office para iti panakakompleto ti maikadua a kadsaaran.
Maipalagip nga Hunyo idi napalabas a tawen ket nasuspindir ti proyekto kalpasan a naibus ti P5-M nga immuna a pondo para iti nasao a pasilidad.
