BAGUIO CITY- Agtultuloy ti nagduduma a programa ti gobyerno tapno maipaayan iti temporary shelter dagiti sigud a rebelde ken ti pamilya dagitoy.
Inyunay-unay ni LtGen. Ernesto Torres Jr., Commander ti Northern Luzon Command, a napudno ti gobyerno iti kampanya daytoy tapno matulongan dagiti indibidwal nga innallilaw ti Communist Terrorist Group.
Impannakelna nga adda ti saggaysa a halfway houses a naipatakder sadiay Lagangilang, Abra; Kiangan, Ifugao; Bontoc, Mountain Province; Tabuk City, Kalinga ken iti innem pay a probinsiya kas pamaneknek iti kinapudno ti gobyerno a tumulong.
Maipalagip a panggep dagiti halfway houses nga agserbi kas temporary shelter dagiti sigud a rebelde ken ti pamilyada kabayatan ti panakaipasidongda iti Enhanced Comprehensive Local Integration Program.
Agserbi pay daytoy kas venue dagiti livelihood trainings ken psycho-socio debriefing kadagiti sigud a rebelde sakbay ti naan-anay a panagsublida iti komunidad.
