BAGUIO CITY – Ipetpetteng dagiti maseknan a mannalon iti Strawberry Farm sadiay La Trinidad, Benguet ti panakaidalan iti konsultasyon ti mapangpanggep a flood control project iti nasao a disso.
Iti panaki-uman ti Bombo Radyo Baguio, kinuna ni Peter Bulangen, presidente ti Swamp Farmers Association, Incorporated a kasapulan ti konsultasyon iti nagbaetan ti DPWH, Benguet State University ken dagiti grupo dagiti mannalon mainaig iti nasao a proyekto.
Kinunana a nagsuratdan iti DPWH-Benguet ken impeksada ti panangtubngarda iti plano a proyekto gaputa maapektaran ti panagmulada.
Inyunay-unayna met a saanda a laplapdan ti nasao a proyekto gaputa pagsayaatan dagitoy.
Nupay kasta, impettengna a kasapulan ti konsultasyon tapnu maibagada met dagiti pakaseknan ken rekomendasyonda iti proyekto tapnu saan unay a maapektaran ti panagmulada.
Innayonna a ti kiniddawda iti provincial government ti Benguet ket ti panakadalus ti kanal sadiay ken saan ketdia a ti panakaiyaramid ti nasao a flood control project.
Sigun paya kenni Bulangen, napintas paylaeng ti kanal sadiay.
