BAGUIO CITY – Marugianen inton sumaruno a lawas ti public hearing ken konsultasyon seknan iti posible a panakaipangato ti minimum wage ditoy rehion Cordillera gapu iti agtultuloy a panagngato ti presyo dagiti gagatangen.
Sigun iti Regional Tripartite Wages and Productivity Board (RTWPB) ti Department of Labor and Employment – Cordillera, umuna a maisayangkat ti konsultasyon sadiay Bangued, Abra inton June 26 bayat a sadiay San Juan, Tabuk City, Kalinga inton June 27.
Sumaruno a maangay ti nasao a konsultasyon sadiay Poblacion, West Lagawe, Ifugao inton July 3 bayat a sadiay Magsaysay Road, siudad ti Baguio inton July 4.
Kinuna ti ahensia a maysa a pagbasaranda iti gatad a posible a mainayon iti sweldo ti inflation rate wenno ti kapartak ti panagngina dagiti presyo dagiti gagatangen ken serbisyo iti rehiyon ken ikonsiderada pay ti panagsuek ti balor ti piso.
Maipalagip nga iti agdama ket P285 agingga P300 ti minimum wage iti Baguio City ken La Trinidad, Benguet bayat a P280 agingga P290 kadagiti agtatrabaho sadiay Tabuk City, Bangued, Bontoc, Lagawe, Banaue, Buguias, Bauko, Sagada ken Tublay ken P270 agingga P280 iti dadduma a probinsia iti rehion.
Naudi a naipangato ti minimum wage ditoy Cordillera idi June 2017 ken sagudayen ti Wage Rationalization Act a posible a tinawen a maipangato ti minimum wage.