BAGUIO CITY – Natiliw ti maysa a kontraktor gapu iti mapapati a panagimetna iti saan a dokumentado a paltog sadiay La Trinidad, Benguet itay laeng nabiit.
Nabigbig daytoy a ni Oscar M. Dodon, 54-anyos, residente iti La Trinidad, Benguet.
Sigun kenni Benguet PPO Acting Provincial Director Pol/Col Reynaldo Pasiwen, rinespondean ti La Trinidad Municipal Police Station ti nasao nga insidente kalpasan nga inyuman ti maysa a maseknan nga umili.
Partikular a nakemmeg ti nasao a kontraktor iti sanguanan ti DPWH Benguet Engineering Office sadiay Wangal, La Trinidad, Benguet kalpasan a naakita ti paltog iti kannawan a bulsa daytoy.
Naala manipud kenkuana ti caliber .45 pistol nga addaan iti tampered a serial number ken magazine daytoy nga awanan iti bala.
Napaay met ti kontraktor a nangiparang iti balido a dokumento iti panagimetna iti paltog.
Maipalagip a namin-ado a daras a naireklamo ni Dodon iti Bombo Radyo Baguio ken iti munisipyo ti La Trinidad idi napalabas a tawen gapu kadagiti serye ti iligal transaksion daytoy mainaig iti lote sadiay Obulan, Beckel iti nasao a munisipyo.
Naamuan a nabayagen ken nagtutuon ti naipaulog a cease and desist order kontra kenkuana idi pay 2019 gapu iti iligal a panagkali daytoy kadagiti saanna a sakop lote.
Naipaayan metten daytoy iti nagtutuon a kaso kadagiti napalpalabas a tawen gapu iti iligal a panagtarakenna iti baboy iti nasao a residential area.** reports from PNPCordillera
