BAGUIO CITY – Inkalintegan ni Baguio City Mayor Benjamin Magalong ti dadaulo ti Public Order and Safety Division (POSD) a ni Marvin Herrera manipud kadagiti mangisaksakad iti panakaikkat daytoy iti posisyon gapu iti maltreatment, harassment, misconduct ken panagabuso.
Iti eksklusibo ng interview ti Bombo Radyo Baguio, inyunay-unay ni Mayor Magalong a babaen iti napintas a tandem da Herrera ken POSD Deputy Chief Daryl Kim Longid ket adu ti napintas a mapaspasamak ken pagbalbaliwan ita ti merkado publiko ti siudad.
Inaklonna a no mamingsan ket agturay ti emosyon gapu iti kinaregget ti maysa nga indibidual iti trabaho daytoy a kas iti napasamak kenni Herrera.
Nupay kasta, impetteng ti mayor a saan nga umdas daytoy tapnu maikkat iti posisyon ni Herrera kas dadaulo ti POSD.
Dinakamatna a no mamingsan ket adda dagiti biddut a maaramid ti tao ken iti benneg ni Herrera ket maysa a leksion ti napasamak.
Sigun pay kenni Mayor Magalong, binagbagaan ken inungtanna ni Herrera ken ditoy nga inyunay-unayna kenkuana ti kinapateg ti panagpakumbaba kabayatan ti panangipatungpal ti trabaho.
Mangnamnama pay daytoy a ti napasamak ti mangpabalin kenni Herrera kas maysa a nasaysayaat nga indibidual ken lider.
