BAGUIO CITY – Inkalintegan ni La Trinidad, Benguet Mayor Romeo Salda a saan a panagkampanya ti insayangkatda a taripnong a naawagan ti Run Sara Run iti deppaar ti BAPTC sadiay La Trinidad, Benguet idi kanikuada kalpasan a nakaawat ti aktibidad iti pammabalaw ken nagduduma a komento manipud iti publiko.
Sigun kenkuana, indauloan ni Benguet Caretaker Congressman Eric Go Yap, Governor Melchor Diclas ken sumagmamano pay nga opisyales ti Benguet ti nasao nga aktibidad a dinar-ayan met dagiti mannalon.
Impettengna nga imparang laeng ti kongresista dagiti plano ken programa daytoy para iti panagdur-as ti Benguet partikular dagiti mannalon a naapektaran iti COVID-19 pandemic.
Inlawlawagna pay a saan a panagkampanya ti panakaipaskil dagiti tarpaulin ken panagsuot dagitoy ti t-shirt a nasuratan ti Run Sara Run United Benguet ngem ketdi, maysa laeng a survey para iti presidendial daughter a mayor ti Davao City.
Impaganetgetna a panggep laeng ti taripnong nga impormaran dagiti mannalon seknan kadagiti tulong a maipaay kadakuada.
Pinaglibakan pay ni Mayor Salda ti akusasyon a saan a nasurot dagiti sumagmamano a minimum health protocols gapu ta sinurotda ti physical distancing ken nagsuot dagitoy iti facemasks.
