BAGUIO CITY – Panggep ti Team Lakay a mangipila ti official letter of protest iti ONE Championship kalpasan ti wrong call iti naudi a laban ni Igorot fighter Geje Eustaquio kontra kenni grappling specialist Kairat Akhmetov [AK-ME-TOV] idi Sabado.
Iti ekslusibo a panakiuman ti Bombo Radyo News Team kenni Eustaquio, kinunana nga urayenda pay ti opisyal a waragawag ti ONE Championship mainaig iti isyu nangruna ta awan pay ti pinal a desisyon ti Team Lakay.
Kinunana nga inaklon a mismo ti ONE Championship a nagbiddut ni Yuji Shimada, ti nagserbi a referee iti labanda kenni Akhmetov.
Imbingayna pay a ginandatna nga agpalawag kenni Shimada idi naipasardeng ti panagatakena kenni Akhmetov ngem impetteng latta ti referee ti desisyon daytoy.
Inurayna pay ti panagdispensa ti nasao a referee kalpasan ti laban ngem awan ti naurayna.
Maipalagip nga impasardeng ni Shimada ti panagatake ni Eustaquio babaen iti upward kicks gaputa iligal daytoy ngem iti alagaden ti MMA ket legal ti nasao a panagatake.
Innayonna a maawatanna nga ar-aramiden laeng ni Shimida ti trabaho daytoy a mangprotektar kadagiti fighters ngem nairana a nakaaramid daytoy ti honest mistake.
Inaklonna a saan a daytoy ti kaunaan a gundaway nga adda ti naabak a fighter ti Team Lakay gapu iti wrong call wenno late stoppage babaen iti referee.
Iti kanito a mapaneknekan a nagbiddut ti referee ket posible a maipatungpal ti rematch da Eustaquio ken Akhmetov ken ti immuna a labanda ket maikonsidera a non-contest.
