Parikot dagiti maseknan a Barangay Officials idiay Barangay Irisan, Baguio City dagiti nabubulok a basura dagiti residente sadiay.
Kasaruno daytoy iti pannakaisera ti land fill idiay Urdaneta City, Pangasinan a pakaiturturungan dagiti basura iti siudad.
Iti pannakiuman ti Bombo Radyo kenni Arthur Diplat Carlos, Barangay Captain iti Irisan Baguio City, kidkiddawenda ti kooperasion dagiti residente tapno saanda pay a mangiparuar kadagiti nabubulok a basura dagitoy.
Ibalbalakad ti nasao a kapitan kadagiti residente nga ikalida iti bakante a lote dagiti nabubulok a basura.
Para kadagiti awanan iti bakante a lote, ibalbalakad ti nasao nga opisial a makisaritada kadagiti kaarubada nga addaan iti bakante a lote tapno idiaydan nga ikali.
Kidkidawen met ti nasao nga opisial kadagiti residente a saanda a paglalauken dagiti basura dagitoy.
Iti agdama, awan ti compose pit ti nasao a Barangay ngem pagtungtungan dagiti maseknan nga opisiales ti pannakaisagana dagiti drum a maikabil kadagiti Purok.
Maaramat daytoy a pakaibellengan dagiti nabubulok a basura.
Kabayatanna, ummapapela ti nasao nga opisial kadagiti residente a saanda nga agibelbelleng iti basura kadagiti kanal nangruna ita a maiparparit ti pannakairuar daytoy.//mp4
