Agparparang a kumarkaru itan ti rinnisiris iti nagbaetan ti kampo da President Ferdinand “Bongbong” Marcos Jr. kenni Vice President Sara Duterte.
Kasaruno daytoy ti kaudian manen a pammabalaw ni Vice President Duterte kontra kenni President Marcos.
Kinunana a saan a nalaing a mangidaulo ti agdama a presidente ken impaayanna daytoy iti rating a 1 percent laeng.
Kagiddan iti daytoy, adu metten ti madukduktalan seknan iti saan nga umno ken kuestionable a pananggastos ti bise presidente iti pondo ti gobyerno a naitalek iti opisina daytoy.
Malaksid iti daytoy, maitaltalmeg met ni sigud a president Duterte iti naglabas a nadara a war on drugs.
Nakadkadlaw met a diversionary tactic ti ar-aramiden dagiti dadduma a maseknan.
Iti sabali a bangir, nabatad a pulitika ti adda iti likudan dagitoy a paspasamak.
Dagiti pilipino ti maluglugi kadagitoy a pagteng isut gapuna a masapul nga agbalin a nasiput ken masirib ti tunggal maysa tapno ammoda no asino ti rumbeng a dasigan dagitoy.
Ti kinapudno ti rumbeng a dasigan ti tunggal maysa ken saan a basta mamat-pati kadagiti dadduma a pulitiko wenno saan a bigbigen ida kas dios a mangispal iti publiko manipud kadagiti pakarigatan dagiti tattao.
Imbes ketdi, rumbeng a malabanan ti kinabirkug ken kurapsiyon tapno saan a masayang ti tunggal piso a buis a pagbanbannugan ti tunggal pilipino.//Bombo Alfred Pudsoc
