BAGUIO CITY – Nadiskobre ti maysa a nailemmeng a pagiduldulinan dagiti komunista a rebelde iti armas dagitoy sadiay Barangay Gueday, Besao, Mountain Province idi kalman.
Maibasar iti report ti Police Regional Office Cordillera, resulta daytoy ti panagresponde dagiti pulis ti Besao, Mountain Province ken dagiti soldado manipud iti 69th Infantry Battalion ti 7th Infantry Division, Philippine Army iti naawatda nga intelligence report mainaig iti nasao a pagdulinan ti armas.
Nasarakan iti nasao a pagdulinan dagiti armas ken materyales para iti komunikasyon, partikular ti mays nga M16 A1 rifle, maysa a command-detonated explosives nga agdagsen ti 2.3 kilograms, uppat a command-detonated explosives nga agpapada nga agdagsen ti 1 kilogram; electrical wire nga addaan kaatiddog a 100 a metro, tallo a two-way radios, maysa a cellphone ken maysa a digital electric tester.
Naipaima iti kustodiya dagiti soldado dagiti nakumpiskar a kagawaan dagiti rebelde para iti umno a panakaidulin ken disposisyon.
