BAGUIO CITY – Tinagiragsak ti grupo ti cut flower ken ornamental plant growers ti La Trinidad, Benguet ti pormalen a panakailukat ti La Trinidad Agri-Products Hub sadiay Guagua, Pampanga.
Sigun kenni Councilor Renato Tereng, chairman ti Committee on Agriculture ti Sangguniang Bayan ti La Trinidad, babaen iti nasao a pasilidad ket maipaayan iti bukod a market dagiti mannalon ken cut flower growers iti munisipyo.
Kinunana a ditoy a mabalin nga ilako dagiti mannalon ken cut flower growers ti La Trinidad dagiti produktoda kas iti nagduduma a mula ken sabong, strawberries, kape ken highland vegetables nga agtaud a mismo iti munisipyo.
Innayonna metlaeng a babaen iti pasilidad ket maipaayan dagiti umili ti La Trinidad iti gundaway a mangpapigsa pay iti pamastrekanda babaen iti direct selling kadagiti produktoda sadiay Pampanga.
Addaan ti Agri-Products Hub iti 21 a pwesto para kadagiti 16 a barangay ti La Trinidad ken daytoy ket paset ti programa a “Sisterhood/Town Twinnings” ti Guagua sadiay Pampanga ken ti La Trinidad.
Mamati pay ni Councilor Tereng a dakkel a tulong ti kailuklukkat a paglakoan gaputa diretso a gatangen dagiti buyers dagiti nagduduma a produkto dagiti mannalon ken saanen a kasapulan a dumalan kadagiti middle men.
