BAGUIO CITY – Panggep ti lokal a gobierno ti La Trinidad, Benguet a gumatang ti kanayonan a heavy equipment para iti Municipal Disaster Risk Reduction and Management Council (MDRRMC) a maaramat iti panawen ti kalamidad.
Sigun kenni Mayor Romeo Salda, addan ti kabarbaro a rescue vehicle ken backhoe ti MDRRMC nga aggatad iti P7-M.
Kinunana a panggepda metlaeng a gumatang ti maysa a loader ken kanayonan a backhoe tapnu adda ti nakasagana nga aramatenda no adda ti panagregaay ti daga kabayatan ti panagdalapos dagiti bagyo wenno napigsa a tudo.
Inlawlawagna a napimpintas nga adda ti bukod a kagawaan ti munisipyo tapnu nabibiit ti panagrespondeda kadagiti mapasamak nga insidente.
Kinuna ti mayor a paset met laeng daytoy iti panakapapigsa ti kapasidad dagiti kameng ti MDRRMC nga agresponde no adda ti sumangbay a didigra.
Dinakamatna nga ado a barangay roads ti munisipyo ti nagserra idi panagdalapos ti bagyo nga Ompong idi napalabas a tawen gaputa awan ti heavy equipment a nangwaknit kadagiti nagreggaay a daga.
Innayonna pay a maaramat met laeng dagiti nasao a kagawaan iti panakadalos dagiti waig iti masakupan ti munisipyo.
