Mangipaay ti Drug Abuse Treatment and Rehabilitation Center-Mountain Province (DATRC-MP) a masarakan idiay Abatan, Bauko, ti libre a psychiatric consultation ken dadduma pay a serbisyo para iti mental health conditions mangrugi inton Mayo 8 iti agdama a tawen.
Karaman metlaeng kadagiti idiaya dagitoy a serbisyo ket para iti alcohol use disorder.
Impetteng ni Randy Samonte, DATRC-MP administrative officer ti kinapateg iti panagkiddaw iti tulong tunggal adda dagiti mapagdaldalanan a narigat a situasyon.
Sigun kenkuana, paset ti mental health iti pakabuklan a wellbeing ti maysa nga indibidual isu’t gapunna a kasapulan metlaeng a maaywanan daytoy.
Maipaay ti nasao a serbisyo tunggal Biyernes manipud alas-otso ti agsapa agingga alas-singko ti malem.
Dagiti indibidual a nadiagnose kadagiti nagduduma a mental health conditions a kasapulan ti kanayunan nga atensyon ket maiyuman iti higher-level facilities wenno maiskedyul iti regular a follow-up consultations.
Para met iti alcohol use disorder consultation, maipaay ti serbisyo iti Lunes agingga Biyernes manipud alas-otso ti agsapa agingga alas-singko ti malem .
Namnamaen ti nasao nga institusyon a ngumato dagiti kliyenteda gapu ta posible nga adda dagiti magapo metlaeng iti kabangibang a luglugar kas iti probinsya ti Benguet ken Ilocos Sur.
Ti nasao nga institusyon ti kaunaan a regional drug rehab center iti rehiyon Cordillera. //bombokaren.c.s
