Nakasagana ti La Trinidad Municipal Police Station para iti maangay a congressman’s night concert iti Benguet State University Oval, idiay Km 6, La Trinidad, Benguet ita nga aldaw a mangrugi iti oras ti alas sais iti malem agingga alas dies iti rabii.
Iti pannakiuman ti Bombo Radyo kenni PLT Col. Benson Macli-ing-Chief ti La Trinidad Municipal Police Station, kinuna a nakasagana dagitoyen ken naituding metlaeng ti pakaideployanda nangruna iti aglawlaw ti nasao a pagadalan.
Impasiguradona pay nga adda dagiti nakabantay nga otoridad para iti seguridad dagiti artista pakairamanan dagiti agbuya.
Naituding met nga agbalin kas importante a bisita dagiti sumagmamano nga artista pakairamanan da Ice Seguira, Jericho Rosales kasta metten dagiti sumagmamano a local artist.
Kabayatanna, nagpalagip met daytoy kadagiti agbuya nga addaan iti lugan a mabalin nga agpark-da kadagiti parking area iti strawberry farm parking lot ken dadduma pay.
Innayonna pay a nasaysayaat a sapsapaen dagiti agbuya nga agturong iti nasao a venue tapno maliklikan ti nailet a gunay ti trapiko.
