Nakasaganan ti La Trinidad Municipal Police Station para iti Oplan Kaluluwa inton sumaruno a bulan.
Babaen iti pannakiuman ti Bombo Radyo kenni PLTCOL. Benson Macli-ing, hepe ti La Trinidad Municipal Police Station, addan ti napagnunumuanda kadagiti barangay captains kadagiti aramidenda tapno masigurado ti kinatalged ti publiko nga agturong kadagiti kampo santo iti nasao a munsipyo.
Innayonna pay nga addan ti binukel ti opisina ti mayor a traffic schemes inton Nobyembre a uno.
Agbalin a one-way ti kalsada nga agturong idiay Buyagan cemetery ken ti Pines Park-Lubas a kalsada manipud alas sais ti agsapa agingga alas singko ti malem.
Dinakamat pay ni Macli-ing a masuspendir ti number coding scheme inton Nobyembre a uno.
Kabayatanna, mabalbalakadan pay laeng dagiti motorista nga agdaliasat iti alternate routes gapu iti nakaru a traffic idiay Km3-Km4.
