BAGUIO CITY – Nakemmeg ti maysa a laborer gapu iti panang-imetna iti mapapati nga iligal a droga sadiay Bonifacio Street, siudad ti Baguio idi kalman.
Nabigbig daytoy a ni Chris Gallano Saliñas, 28-anyos, awanan asawa, tubo ti Ilocos Sur ken stay-in iti maysa a construction site sadiay Bonifacio Street.
Maibasar iti report, agpatpatrolya dagiti pulis iti paset ti Bonifacio Street idi nakitada ti suspek ken dagiti kakadua daytoy nga agsigsigarilyo.
Sinilawan dagiti pulis ti direksion ti suspek ken ti kakadua daytoy ngem sadiay a nakitada ti panangkaut ti suspek iti bulsana ken iti panangitinnagna iti maysa a banag.
Timmaray ti suspek ngem kinamatda daytoy ken sadiay a narekoberda ti intinnag daytoy a sachet ti mapapati a shabu a naikabil iti balay ti sigarilyo.
Naipaima ti sachet iti PNP Crime Lab para iti laboratory test bayat a naipasidong ti suspek iti drug test.
