BAGUIO CITY – Pimmusay ti maysa laborer kalpasan a binagbagsol ti kadwana a nag-inom ti arak iti uneg ti maysa a kalapaw sadiay Firstgate, Ucab, Itogon, Benguet idi Sabado, September 7.
Naideklara a dead on arrival iti Baguio General Hospital and Medical Center (BGHMC) ni Chistopher Balanni alyas Stop, tubo ti Banaue, Ifugao ken residente ti Firstgate, Ucab.
Nakemmeg met ti suspek a ni Kazy Binuhe Nahuyaman, 25-anyos, baro, tubo ti Hingyon, Ifugao ken residente ti Ucab, Itogon.
Maibasar iti report, nakaawat iti tawag ti Itogon Municipal Police Station manipod iti BGHMC maipapan iti mapapati nga insidente ti pammagsol sadiay Firstgate, Ucab.
Naduktalan iti imbestigasyon dagiti pulis nga adda ti saan a nagkinnaawatan dagiti dua kabayatan ti panag-inomda iti arak iti uneg ti kalapaw dagitoy a nangitunda iti panangbagbagsol ti suspek iti kanigid a barukog ti biktima.
Naglibas ti suspek kalpasan ti insidente ngem boluntaryo metlaeng a simmuko kadagiti kameng ti Itogon PNP sadiay Rockshade, Taloy, Tuba, Benguet Dominggo. (with Bombo Brigitte Marcasi)
