Nakaawat ti Commission on Elections-Baguio iti ladawan a mangipakpakita iti mapapati a vote buying no sadino makita ti envelope wenno maysa a membership card a mapapati nga adda kargana a kuarta a maiwarwaras iti publiko.
Gapu iti daytoy, kinarit ni Atty. John Paul Martin, Election Officer iti Commission on Elections-Baguio ti nangipatulod nga agipila dagitoy iti reklamo wenno agreport dagitoy iti opisinada.
Iti pannakiuman ti Bombo Radyo kenkuana, kinunana a saan dagitoy a mabalin a rugyan nga agimbestigar agsipud ta awan ti umno nga impormasyon maipapan iti nasao a ladawan.
Impettengna a napateg nga agreport dagiti nangipatulod iti nasao a ladawan tapno adda iti basaran dagitoy agsipud ta napateg ti impormasyon ti adda iti ladawan nangruna ti naganna, ti lugar a nakapasamakan daytoy, no kaano a napasamak daytoy ken dadduma pay.
Sigun kenkuana, kasapulan metlaeng ti presensya dagiti witness a mangpaneknek iti nasao nga isyu.
Iti baet dayta, impasigurado ti nasao nga opisyal nga agtalinaed a confidential ti pakabigbigan dagiti agreport para iti seguridad dagitoy.
Kabayatanna, nagballaag met daytoy iti publiko nangruna dagiti kandidato a suruten ti pagalagadan iti eleksyon kasta metten nga awan ti vote buying wenno vote selling tapno makapagconcentrate dagiti botante iti pilienda nga ibutos.
Malaksid iti dayta, al-allukuyenna pay ti publiko a mangipila iti reklamo wenno agreport dagitoy iti social media account ti kontra bigay commitee wenno agreport kadagiti kaasitgan nga opisina ti Commission on Elections no makaimatangda vote buying activities tapno maaksyunan daytoy.
