BAGUIO CITY – Nagpositibo iti COVID-19 ni Lagawe, Ifugao Mayor Martin Habawel Jr., pakairamanan ti asawana.
Nailanad iti statement ti mayor nga awan met ti dadduma a kameng ti pamilyada a nakaptan iti nasao a sakit.
Nupay kinunana a nainget met ti panagsurot ti pamilyada kadagiti paglintegan tapnu makaliklik iti COVID-19, inaklonna a kas public servant ket saan a maliklikan a makapulapolna ti adu a tattao kagiddan ti agtultuloy a panakailista ti kaso ti COVID-19 iti komunidadda.
Imbinglayna nga idi Martes, Abril 13 ket nakarikna ti asawana iti panaggatel iti karabukob a sinaruno ti sagpamingsan a panag-uyek ken saan a napintas a rikna.
Gapu iti daytoy, nagpasidongda a sangkapamilya iti RT-PCR ken naipatulod dagiti specimens iti maysa a pribado a laboratoryo iti siudad ti Baguio.
Dinakamatna a rimwar ti resultada idi kalman ken ditoy a nailanad a positiboda nga agasawa iti COVID-19 nupay awan met ti marikriknana ita nga aniaman a sintomas ti nasao a sakit.
Nabalakadan metten iti panagpakonsulta ken panagpa-contact trace dagiti amin a nakapulapolda nga agasawa iti napalabas a pito nga aldaw.
Balbalakadan pay ni Mayor Habawel ti publiko iti kanayon a panagannad iti innaldaw nga aktibidad ken iti panagsurot kadagiti amin a paglintegan kontra iti COVID-19.
Kabayatanna, iti datus ti Department of Health-Cordillera, dua a gobernador ken 22 a mayor iti rehion ti nakaptan iti COVID-19 nupay maysa kadagiti mayor ti pimmusay, partikular daydi Kabayan Mayor Faustino Aquisan.
