Pimmusay ti maysa a lalaki, agtawen ti 48, supervisor ti Production Department iti maysa a pagminasan idiay Tuba, Benguet kalpasan a nagaburan idi Disiembre 1, 2025 gapu iti napasamak a soil/rock erosion.
Ti biktima ket naasawaan, tubo ti Pangasinan ken agdama a residente iti Philex Mines, Camp 3, Tuba, Benguet.
Maibasar iti report ti Tuba Municipal Police Station, napasamak ti insidente iti pasado alas-6 ti malem idi Disiembre 1, 2025 ngem naireport laeng kadagiti otoridad iti alas-10:30 ti agsapa idi Disiembre 2, 2025.
Ti insidente ket napasamak iti 782 Meter Level, Production Line 7, Mock Rest ti Mining Company, Camp 3, Tuba, Benguet.
Iti imbestigasion, manarimaan ti panag-operate ti biktima iti scoop-drive idi kellaat a nargaay ti ‘boulder’ ti bato ken pitak a nanggabur ti biktima ken ti ‘equipment.’
Dagos met a nangipatungpal ti retrieval operation dagiti empleyado ken safety department ti mining company.
Nabaelanda met a narekober ti biktima manipod iti cabin ti nasao nga equipment iti pasado alas-3 ti malem. Dagos a naitaray iti ospital ngem naideklara a pimmusay iti alas-3:30 ti malem.
Sigun iti naka-duty a doktor iti ospital, pimmusay ti biktima gapu iti secondary to entrapment gapu iti mud rush.
Saan metten a naipasidong ti bangkay ti biktima iti autopsy. Patien iti pamilia iti biktima a pimmusay daytoy gapu iti aksidente. | via Bombo Noveh Organo
