Pimmusay ti maysa a lalaki kalpasan a nabagsol iti maysa a balay paginuman idiay Leonard wood loop, Baguio City idi kalman.
Nabigbig ti suspek a ni Mark Angelo Espitula, addan iti legal nga edad ken residente iti Bakakeng, Baguio City bayat a ti biktima ket ni Gibriel Vallejos Bangura, addaan iti asawa ken residente iti South Sanitary Camp, Baguio City.
Iti pannakiuman iti Bombo Radyo kenni Police Captain Arthur Opate, Chief Investigator ken Police Commmission Officer iti Baguio City Police Station 3, kinunana a napasamak ti insidente iti uneg ti balay paginuman ken nagramot daytoy kalpasan a nagkinnorsunada ti nagsinnumbangir a table a nangitunda iti panagdidinnanog dagitoy.
Pinadas ti biktima nga agannawa ngem daytoy ti binagsol ti suspek iti makanawan a paset ti tiyan daytoy.
Dagus a naiturong iti pagagasan ti biktima ngem naideklara metlaeng a pimmusay gapu iti Hypovolemic Shock secondary to acute blood lose.
Sigun pay kenni Opate, addaan iti permit ti balay paginuman.
Nupay kasta, addaan da iti violation isu’t gapuna a nangipaulogda iti violation of liquor code.
Iti agdama, sumangsango iti kaso a murder ti suspek kalpasan a nakemmeg iti impatumpal dagiti otoridad a Hot pursuit.
Agtultuloy metlaeng ti monitoring iti Police Station 3 kadagiti balay panginuman iti masakupan dagitoy tapno maliklikan ti kapada nga insidente.//mp4
