BAGUIO CITY – Naipilan ti kaso a panaglabsing iti Article 308 ti Revised Penal Code lalaki a nanggandat nga aglibas kalpasan ti panagdukotna sadiay Km. 5, Pico, La Trinidad, Benguet idi kalman.
Nabigbig daytoy a ni KEVIN L. VILLEGAS, agtawen iti 30, tubo ti Ilocos Sur ken agnanaed sadiay Qurino Hill, Baguio City bayat nga agtawen met iti 32 ti ina nga biktima ken residente ti Acop, Tublay, Benguet.
Maipalagip a nagresulta iti komosion ti panangtiliw dagiti personnel ti La Trinidad Municipal Police Station iti lalaki a nangdukot iti cellphone ti maysa nga ina kabayatan ti panagna daytoy iti paset ti Km 5.
Dagus a nagriyaw ken nagpaarayat ti biktima agingga a naala ti atension ti traffic personnel a ni PCpl Marlon Esden a madama met nga agimanmando ti trapiko iti nasao a gundaway ken ditoyen a kinamatna ti suspek agingga a nakemmeg iti katengngaan ti kalsada.
