Impasigurado ti Bontoc Municipal Police Station a mangipiladan ti reklamo inton sumaruno a lawas kontra iti indibidual a nangkugkugtar iti dua nga ubbing idiay Mountain Province.
Iti interview ti Bombo Radyo (Cauayan) kenni Police Major Ryan Wakat, hepe ti Bontoc Municipal Police Station, kidkiddawenna ti pannakaawat gaputa ti nasao a kita ti kaso ket nabayag iti prosesona ken kasapulan a dumalan iti social case study kaduana ti Municipal Social Welfare and Development Office.
Kabayatanna, agtultuloy met a maipaspasidong iti counselling ti dua a menor de edad a biktima.
Maipalagip a nagwaras iti social media ti panangkabkabil ti maysa a lalaki iti dua a biktima nga agbubuya laeng iti basketball.
Sigun kenni Police Major Ryan Wakat, ti insidente ken napasamak iti sanguanan ti Sta. Rita de Cascia Cathedral.
Maibasar iti naalada nga impormasion, nakatugaw laeng iti ruar ti simbaan dagiti biktima ken agbuybuya kadagiti agay-ayam ti basketball idi mapapati a kellaat nga akusaran ti suspek a saan a nasayaat ti panagkita dagitoy kenkuana.
Ditoy nga inasitgan ti lalaki dagiti biktima tapno maipakita kano kadakuada dagiti nasursurona iti Muay Thai gapu iti mapapati a panagsanayna iti martial arts.
Iti video nga agwarwaras iti social media, makita ti suspek a nagsinnaruno a kinugtaranna ti dua a biktima bayat a maysa kadagiti ubbing nga adda iti dayta a gundaway ti nangala ti video
