Pimmusay ti maysa a lalaki nga agtawen ti 88 a residente iti Bakakeng Central, Baguio City kalpasan nga aksidente a nadungpar bayat ti panagballisiwna iti kalsada.
Maibasar iti report, napasamak ti insidente iti pasado alas-5 iti malem idiay Aspiras-Palispis Highway, Bakakeng Central, Baguio City, sangwanan iti maysa a minimart.
Iti inisial nga imbestigasion iti pulisia, ti lugan a nakadungpar ti biktima ket imanmaneho iti agtawen iti 46 a residente iti Asin Road, Baguio City.
Rumrummuar a bayat a paturong ti drayber iti nasao a lugar, naobserbaranna ti biktima a nakatakder a nakasardeng iti tengnga iti kalsada.
Intuloy iti drayber a nagmaneho ngem kellaat a nagballasiw ti biktima a nangitunda iti pannakadungparna.
Gapu iti dayta, nagsagrap ti dunor iti muging ti nasao a biktima.
Naitaray a dagos iti ospital ti biktima ngem pimmusay metlaeng gapu iti hypovolemic shock.
Naipasidong met iti alcohol breath test ti suspek ngem saanen a nailanad ti resulta ti test.
Kabayatanna, saan metten a nangipila iti kaso dagiti pamilia iti biktima kontra iti suspek.
Nangngeddeng laengen dagitoy a maisimpa ti nasao a kaso babaen ti settlement agreement.
Ti bangkay ti biktima ket naiyawid idiay Kabayan, Benguet para iti lamay ken pannakaitabon daytoy.| via Bombo Noveh Organo
