Nakemmeg iti maikapat a gundaway ti maysa a lalaki, alyas “Son,” agtawen iti 43, maibilbilang a High Value Target, ken residente iti City Camp Proper, Baguio City gapu iti iligal a droga.
Iti naisayangkat a buy-bust operation, natiliw ti suspek babaen kadagiti kameng iti NBI-Cordillera kaduada ti PDEA Baguio a naipatungpal iti City Camp Road, City Camp Proper, Baguio City.
Iti impormasyon a nakalap iti Bombo Radyo Baguio, agarup lima nga operatiba ti nangtiliw iti nasao a suspek.
Iti imbestigasion, dua a bulto wenno 10 grams kuma ti ilako ti suspek a maatap a shabu ngem maysa a sachet laeng ti intulod daytoy.
Apaman a narikna ti suspek nga operasyon ti nasao a transaksyon, dagosna nga impurwak ti kuarta ti buy-bust money iti uneg iti luganna nga agbalor iti P27,000.
Dumanon met iti 4.9 grams ti nakumpiskar dagiti operatiba a maatap a shabu manipod iti suspek.
Nakumpiskar metlaeng ti cellphone, buy-bust money, ken dadduma pay a personal a kagaawan iti suspek.
Kabayatanna, nagpositibo iti drug test ti suspek.
Nupay kasta, idi dimmalan ti eksaminasyon ti inlako iti suspek a shabu, rimmuar a negatibo. Gapu iti daytoy, makasuan daytoy iti estafa.
Manamnama metlaeng a makasuan ti suspek iti kaso a panaglabsung iti Section 5 iti Article 2 iti Comprehensive Dangerous Drugs Act of 2002. |via Bombo Noveh Organo
