SOUTH KOREA – Ammo yo kadi ka-Bombo a maysa a lalaki ti nangisubli iti tinakawna a kwarta manipud iti templo dua pulo ket pito a tawenen ti napalabas idiay South Korea?
Insubli ti lalaki ti 30,000 won wenno P1,200 a tinakawna manipud iti donation box idi ubing paylaeng daytoy.
Sigun iti maysa nga staff ti templo, nasarakanna ti envelope a naglaon ti donasyon a 2 million won wenno P80,000 ken apology letter iti donation box iti Jajangam Hermitage’s Tongdo Temple idiay Gyeongsang, South Korea.
Iti nasao a letter, inaklon ti lalaki a tinakawna ti 30,000 won bayat ti Asian financial crisis idi tawen 1997.
Nakalanad pay iti surat a pinadasna a nagsubli iti nasao a templo tapno agtakaw manen ngem nilapdan ti maysa a monk.
Daytoy nga insidente ti nagbalin a karit kenkuana tapno baliwana ti saan a napintas nga aramidna ken nangtignay kenkuana tapno agbiag a nasayaat.
Innayon pay ti lalaki a namnamaenna a maipasngay ti anakna nu sadino kayatna nga agbalin a napintas nga ama para iti daytoy.
Nagdispensar ken nagyaman metlaeng daytoy iti nasao a monk babaen iti surat daytoy.
