BAGUIO CITY- Maob-obserbaran ita iti pagagasan ti maysa a lalaki kalpasan a binagbagsol daytoy ti maysa a lalaki iti sangwanan ti maysa a pagtagilakuan sadiay Km. 4, Marcos Highway, Bakakeng Central, Baguio City idi kalman.
Nabigbig ti biktima a Arvin Alcantara, 24-anyos, awanan asawa ken residente ti Suello Village, Bakakeng Central, Baguio City bayat a nabigbig ti suspek a ni Rey Lakandula alias Robinhood, adda iti legal nga edad, awanan trabaho ken agab-abang sadiay Bakakeng Central, Baguio City.
Maibasar iti report, paawid ti biktima ken ti katrabahuanna idi nakitada ti maysa pay a katrabahuanda a ni Daryll Bastillo iti sangwanan ti maysa a pagtagilakuan.
Inasitgan dagiti dua ti nasao a katrabahuanda ken sadiay a nadlawda ti nabara a panakisubang daytoy iti suspek.
Nakiballaet ti biktima ken inanawana ti suspek babaen iti panangiduronna iti daytoy.
Nupay kasta, dagus nga inruar ti suspek ti maysa a kutsilyo ken sadiay a binagbagsolna ti biktima iti namin lima a daras sakbay a naglibas.
Dagus a naitaray ti biktima iti pagagasan nga ita ket naka-confine bayat a maan-anop ti suspek.
