Naireklamo ti maysa a lalaki kalpasan a saan a nagbayad iti rental fee iti lugan nga inaramatna iti las-ud iti dua a bulan idi napan a tawen.
Maibasar iti impormasyon manipod iti kapulisan, maysa a parttime driver ken liaison officer ti nagkiddaw iti biktima nu mabalinna nga iparenta ti Toyota Hi-Ace a lugan iti kliyenteda nga ita ket isu a naireklamo.
Sigun iti parttime driver, mapagtalkan ti nasao a kliyente gapu ta nakapagbayad met daytoy iti sibubukel a gatad kadagiti immunan a nagrentaanna iti lugan.
Malaksid iti dayta, ti kliyente ket mapapati a maysa nga wholesaler iti bagas ken nateng ken addaan metlaeng daytoy iti van rental business.
Gapu iti dayta, nagtalek ngarod ti biktima nu sadino, napagnunummoan nga agbayad iti PhP500 rent ti kliyente tunggal aldaw, ken kanayonan a PhP1500 nu agbiahe daytoy iti Baguio City ken iti Benguet.
Nupay kasta, kasapulan ti kliyente iti agbayad iti PhP2500 nu ibiahena ti rinentaanna a lugan iti ruar iti Baguio City ken iti Benguet.
Maibasar metlaeng iti impormasyon iti kapulisan manipod iti salaysay ti biktima, nagdagop a PhP101,000 ti kasapulan a bayadan ti kliyente ngem dumanon laeng iti PhP8,000 ti naibayad daytoy idi insublina ti lugan idi metlaeng napan tawen.
Gapu iti dayta, naggigiddan dagiti biktima, ti kliyente wenno ti suspect, ken ti parttime driver iti istasyon iti pulisya tapno ikamang ti nasao a pakaseknan.
Depensa ti suspect, saanna a nabayadan ti pakabuklan a gatad a kasapulanna a bayadan gapu ta nagbayad daytoy iti LTFRB gapu metlaeng iti violation wenno panaglabsingna a saanen nadakamat.
Kasaruno dayta, nagpipinnirma dagiti tallo nga indibidwal iti “contract of settelement of debt” nu sadino, nakalanad iti daytoy a kasapulan a bayadan ti suspect ti balanse daytoy a PhP93,500 babaen iti installment nga agingga laeng koma Enero ita a tawen.
Nupay kasta, saan a nagbaybayad ti suspect iti baet a kanayon nga ifollow-up ti biktima ken ti parttime driver daytoy.
Iti baet a naipatulod ti pinal a demand letter, saan latta nga inkaskaso ti suspect daytoy ken kumpiansa ti asawana nga uray maipilaanda iti kaso ket madismisar metlaeng gapu ta patienna a daytoy ket “civil in nature,” a maatap a kinuna ti abogadoda.//Bombo Genzel Depayso
