BAGUIO CITY – Nakemmeg ti maysa a lalaki gapu iti panangdangdangranna iti nakainomanna sadiay Mayangyang, Suyoc, Mankayan, Benguet idi kanikadua.
Nabigbig daytoy a ni Rommel Matias Domingo, 34-anyos bayat a ti biktimana ket ni Jordan Pablito, 19-anyos, agpadada a residente iti nasao a lugar.
Maibasar iti imbestigasyon, agin-inom ti biktima, ti suspek ken dagiti dadduma a kakaduada idi malem kalman iti maysa a tersina sadiay idi timmaud ti nabara nga argumento iti nagbaetan ti suspek ken biktima.
Dinanog ni Domingo ti ulo ni Pablito sakbay a pinang-or ti suspek ti likod ti biktima babaen iti asero a tugaw.
Dagus nga inanawa dagiti kakaduada ti suspek ngem idi paawiden ti biktima ket ginandat ti suspek a nakaimet iti dakkel a bato a kamaten daytoy.
Gapu iti buteng ti biktima, limmagto daytoy iti kanal nga addaan kauneg a sangapulo a kadapan a nangitunda iti panakadunor ti ulona.
Naispal daytoy ken naitaray iti Lutheran Hospital sadiay Abatan, Buguias ngem naiyakar daytoy iti Baguio General Hospital bayat a nakemmeg ti suspek babaen kadagiti nagresponde a kameng ti Mankayan PNP.
