BAGUIO CITY – Naibalud ti maysa a lalaki kalpasan a tinakawan ken binutbutengna ti dua nga estudiante sadiay Melvin Jones Grandstand ditoy siudad ti Baguio idi kalman.
Nabigbig ti suspek a ni Federico Mendiola ngem saan a nabigbig ti nakalibas a kadwa daytoy bayat a dagiti biktima ken agpada nga estudiante iti maysa nga unibersidad ditoy siudad.
Sigun iti Baguio City Police Office, kabayatan a nakatugaw dagiti biktima sadiay Melvin Jones ket immasideg ti dua a suspek.
Binutbuteng dagiti suspek ti dua a biktima ken nagpammarang pay dagitoy kas kameng ti pulisya.
Sigun kadagiti biktima, napilitanda nga itedda kadagiti suspek dagiti cellphone-da nga aggatad iti P6,000 ken P8,000 gapu ta dinangran dagitoy dagiti suspek.
Kalpasanna ket inbaga dagiti suspek nga agturong dagiti biktima iti opisina ti Women and Children’s Protection Desk ngem saan a nagtulnog dagiti biktima gapu ta nakitada a saan met a nagturong dagiti suspek iti inbagada nga opisina.
Gapu iti daytoy, nagreport iti istasion ti pulisya dagiti biktima ken iti naipatungpal nga operasion ket nakemmeg ti maysa a suspek ngem saanen a narekober iti ikot daytoy dagiti cellphone dagiti biktima.
Agtultuloy ti imbestigasion dagiti otoridad para iti pannakakemmeg ti maysa pay a suspek iti nasao a kaso.
