BAGUIO CITY – Nakemmeg ti maysa a lalaki kalpasan a binagnagsolna ti dua nga ag-uliteg sadiay Cuta, Poblacion West, Lagawe, Ifugao
Nabigbig daytoy a ni Sherwin Ballogan, 36-anyos, sigud nga OFW bayat a dagiti biktimana ket nabigbig a da Engr. Manuel Halupe, 46-anyos, empleyado ti Ifugao Provincial Engineering Office ken ni Robert Lupai Jr., 17-anyos, bin-ig dagitoy a residente iti nasao a lugar.
Maibasar iti imbestigasion ti pulisia, nagturong ti suspek iti balay ti menor de edad a biktima a nakaimet iti natadem nga steel bar ken killaat a binagsolna ti abaga ti biktima.
Inkagumaan ti menor de edad a nagpaarayat iti ulitegna ngem binagsol met ti suspek ti kanigid nga abaga daytoy.
Dagus a naglibas ti suspek kalpasan ti insidente ngem sinurot daytoy dagiti kaaruba dagiti biktima agingga a dimteng dagiti pulis ken kinemmegda ti suspek iti uneg ti balay daytoy nga ilemlemmeg dagiti kapamilyana.
