BAGUIO CITY – Pimmusay ti maysa a lalaki kalpasan a natupakan iti bato ti ulo daytoy bayat a nakalugan iti parapasahero a bus sadiay Sitio Begis, Poblacion, Marcos Highway, Tuba, Benguet idi kalman ti rabii.
Nabigbig ti pasahero a pimmusay a ni Pedro Flores, 58-anyos, naasawaan, karpentero ken residente ti Dilan, Puzurobio, Pangasinan bayat a nagsagrap met iti dunor ti driver ti bus a nabigbig a ni Raymond Tizon Elorde, addaan ti legal nga edad ken residente ti Loakan, Baguio City.
Sigun ken ni Police Major James Acod, hepe ti Tuba Municipal Police Station, daldayasaten ti parapasahero a bus ti Marcos Highway nga agturong koma sadiay lowland idi kellaat a nagtulid ti maysa a dakkel a bato a nangtupak iti sango a paset ti bus partikular iti driver side a nagresulta iti pannakadadael ti maikadwa a tawa ti bus.
Dagus a naitaray iti pagagasan ti pasahero ngem kalpasan ti nasurok maysa nga oras ket naideklara daytoy a pimmusay bayat nga agpapaimbag metten ti driver.
