Nainget ti panagbantay dagiti otoridad kadagiti landslide prone areas kasta met kadagiti kalsada sadiay Sablan, Benguet kagiddan ti mapaspasaran a bagyo a Kristine.
Iti panakiuman ti Bombo Radyo kenni Police Captain Christopher Banglo, dadaulo ti Sablan Municipal Police Station, kinunana nga addan ti koordinasyonda iti Municipal Disaster Risk Reduction and Management Office para iti panakabigbig dagiti lugar a mabantayan.
Malaksid iti dayta, naballaagan met ti publiko nga agbakwit dagitoy a dagus nu kumaro pay ti saan a nasayaat a sasaaden ti panawen nga intunda ti bagyo a Kristine.
Silulukat met ti opisina dagiti otoridad para iti panagtulong kadagiti residente ken nakalukat ti linya ti komunikasyon para kadagitoy nangruna ket full force dagitoy nangrugi idi Martes.
Sigun kenni Banglo, awan pay ti nagbakwit a tattao gapu iti bagyo ken silulukat dagiti kakalsada kas iti Naguilian road wenno dagiti anyaman a kalsada paturong sadiay Sablan, Benguet.
Kabayatanna, umap-apela ni Banglo kadagiti residente ti Sablan a nu awan ti importante nga agenda dagitoy ket agnaedda ladta iti pagtaenganda tapnu maliklikan ti anyaman nga insidente.
Malaksid iti dayta, nagpalagip daytoy kadagiti motorista nga agannad dagitoy iti panagbyaheda gapu ta kangrunaan a mapaspasamak a vehicular traffic ket gapu iti driver error.
