BAGUIO CITY – Bimmaba bassit ti lebel ti danum iti Burnham Lake no ikumpara iti napalpalabas a bulan a kalkalpas ti panagtutudo.
Sigun kenni City Environment and Parks Management Office (CEPMO) head Cordelia Lacsamana, pagtotongtonganda no kasano a manayonan ti danum iti nasao a dan-aw nangruna ta adu a volume ti danum ti kasapulan no agnayonda iti danum.
Kinunana nga imbes a maikabil ti nasao a volume ti danum iti Burnham Lake ket nasaysayaat no aramaten daytoy dagiti umili iti siudad ti Baguio nangruna ta manamnama manen ti panagadu dagiti tattao ken ti parikut iti suplay ti danum.
Innayonna a manamnama a bumaba ti lebel ti danum iti Burnham Lake gapu iti isasangbay ti dry season wenno tikag.
Dinakamatna a mangnamnamada latta nga agtudo tapnu manayunan ti danum iti dan-aw.
