Nangipaay ti Municipal Government ti Itogon kadua ti Department of Social Welfare and Development Cordillera (DSWD CAR) tii cash relief assistance kadagiti hog raisers a naapektaran iti African Swine Fever (ASF).
Kagidan dayta, nangipaay metlaeng ti DSWD iti tulong kadagiti pamilya a naapektaran iti naglabas a bagyo ken habagat.
Sigun iti nasao a munisipyo, agarup 37 a hog raisers ti naapektaran iti nasao a sakit dagiti baboy.
Naipaay kadagiti kuwalipikado a benepisyaryo iti P8,000 ken P20,000 depende nu manu ken edad dagiti baboy a napapatay gapu iti nasao a sakit.
Kanayonanna, nangipaay met ti Department of Social Welfare ken Development -Cordileera Administrative Region (DSWD-CAR) iti financial assistance nga aggatad iti P5,000 agingga iti P10,000 kadagiti benepisyaryo.
Kasaruno daytoy iti kiddaw ti Itogon Municipal Social Welfare and Development Office (MSWDO) para iti kanayunan a suporta kadagiti naapektaran.
Guyguyugoyen met ti lokal a gobyerno ti Itogon ti publiko nangnangruna kadagiti naapektaran a saan pay a nangireport nga ipakaammoda iti Municipal Social Welfare and Development Office para iti mayanatup a government assistance.
Kabayatanna, nangipaay met ti DSWD-Cordillera iti Emergency Cash Transfer (ECT) assistance kadagiti pamilya a naapektaran ken nakapasar iti crisis kabayatan iti bagyo, dua a bulanen ti napalabas.
Agarup 80 met a pamilya ti nabigbig para iti assistance. Manipud iti nasao a bilang, 11 pamilya ti nadadaelan ti pagtaengan no sadino nakaawat ti tunggal pamilya iti P17,100. Kanayonanna, 68 met a pamilya ti nakapasar iti partial damage kadagiti babbalayda no sadino nakaawatda met iti sag-P7,600.
