BAGUIO CITY – Manamnama nga agtaripnong dagiti lokal a gobyerno ti Buguias, Benguet ken Tinoc, Ifugao para iti panakarisut ti boundary dispute iti nagbaetan dagitoy.
Kasaruno daytoy ti panaikkat ti sign board wenno karatula nga imbangon ti lokal a gobyerno ti Buguias sadiay Sitio Ging-aw, Catlubong, Buguias nga addaan tatak nga “UMALI KAYO MUNICIPALITY OF BUGUIAS THE VEGETABLE PANORAMA OF THE NORTH PROVINCE OF BENGUET”.
Sigun kenni Buguias Vice Mayor Dione Baucas, ti nasao a disso a nangimuntaranda iti signage ket sakop ti Catlubong, Buguias kas maibasar iti 1993 Cadastral Survey.
Kinunana nga adda dagiti signages nga immunan nga immuntar ti lokal a gobyerno ti Tinoc iti kapada metlaeng a disso a saan a nainkonsulta iti lokal a gobyerno ti Buguias isut gapuna a nagprotestada tapno maikkat dagitoy.
Nupay kasta, impettengna a saan nga inkaskaso ti lokal a gobyerno ti Tinoc
ti kiniddawda a panakaikkat dagiti signages gaputa adda met ti ilablaban dagitoy a dokumento a napetsaan idi 2015 a mangibagbaga a sakop ti Tinoc ti nasao a disso.
Iti baet daytoy, impaganetget ni Baucas a saanda nga inikkat dagiti signages nga immuntar ti lokal a gobyerno ti Tinoc no di ket nangipasdekda met ti bukkodda a signage iti kapada metlaeng a disso.
Dinakamatna pay a nasurok iti P100-K ti gatad ti sign board nga immuntarda idi july 16 ngem naduktalanda laengen iti kabigatanna a naragadi ken naipanaw daytoy.
Naamuan a saan paylaeng a naduktalan ti kinasiasino dagiti nang-ikkat iti nasao a sign board ngem kinuna ti bise mayor nga agtutungtongda iti lokal a gobyerno ti Tinoc para iti panakarisut ti mapagin-inagawan a disso.
Inyunay-unayna a saan nga umdas ti insidente a paga-apaan nangruna ta agkailian ti Buguias, Benguet ken Tinoc, Ifugao. (-report ni Bombo Cara Sacyaten)
