Nagbalinen a linteg ti naipila a gakat a mangimanmandato iti panangipaay iti gobyerno iti libre a funeral services kadagiti marigrigat a Pilipino a saan a makabael a mangipaay iti nasayaat a panakaimansayag dagiti ipatpategda iti biag.
Ti Republic Act 12309 wenno ti Free Funeral Services Act ket maysa itan a linteg iti baet a saan a pinirmaan ni President Ferdinand Marcos Jr. gapu ta saanna metlaeng nga inaksyunan daytoy 30 nga aldaw kalpasan nga insumitir daytoy iti Kongreso idi August 28,2025.
Ti nagbanagan ti gakat ket maitunos iti Article VI, Section 27 (1) iti 1987 Constitution.
Iti bileg daytoy, na-institutionalize ti funeral assistance initiative iti Department of Social Welfare and Development(DSWD) babaen iti programa nga Assistance to Individuals in Crisis Situation (AICS).
Iti nasao a paglintegan, ipaay ti gobyerno ti free funeral services kadagiti umili a makapaspasar iti krisis kas kadagiti indigent families, dagiti naapektaran iti kalamidad ken didigra, kasta metten dagiti daduma pay nga emergency situations.
Ti serbisyo ket ipaay dagiti accredited a funeral establishments nu sadino, ti maseknan a regional office iti DSWD ti mangbayad iti daytoy maitunos iti katulagan a pinirmaan iti nasao nga opisina ken ti mangibagi iti maseknan a pamilya.
Saklawen ti free funeral package ti panakaisagana dagiti funeral documents, panakaembalsamo,transport, panakaipaay iti lungon (casket),panakaitabon, kasta met ti cremation ken inurnment.
Tapno maala ti maseknan a pamilya ti serbisyo, kasapulan a mangipakita iti valid ID, death certificate manipod iti maseknan a local health office wenno pagagasan, funeral contract, ken social case study nga isagana metten iti social worker.
Kabayatanna, mabalin a mamulta iti agingga ₱400,000 ken panaka-ikkat iti lisensya nga agoperate dagiti funeral establishments nga agkedked a mangipaay iti nasao a serbisyo.
Iti sabali a bangir, mabalin met a mamulta iti agingga ₱500,000 ken panakaibalud nga agingga iti innem a bulan dagiti maduktalan a siuulbod nga agala iti nasao a serbisyo.
