Naaprobaranen iti Senado ti maikatlo ken maudi a pannakaibasa ti gakat a mangipaay ti libre a “funeral services” para kadagiti nakurapay a pamilia a Pilipino.
Nakaala ti 22 affirmative votes, zero negative vote, ken zero abstention ti Senate Bill No. 2965, wenno ti Free Funeral Services Act nga inisponsoran ni Senador Imee Marcos.
Nakalanad iti gakat a maipaay ti libre a funeral services kadagiti pamilia nga adda iti krisis a kasasaad nga inkeddeng ti Department of Social Welfare and Development (DSWD) agraman ngem saan a limitado kadagiti napanglaw a pamilia, wenno dagiti naapektaran kadagiti kalamidad, didigra, wenno dadduma pay nga emerhensia a kasasaad.
Ti mangidaulo nga ahensia iti pannakaipatungpal ti addang ket ti DSWD bayat a ti Department of Trade and Industry (DTI) ti mangmonitor ken mangregulate iti agdama a presio ti funeral services, agraman ti presio dagiti lungon ken “urn” tapno malapdan ti nalabes a panagngato ti presio.
Malaksid iti Senate Bill No. 2965, lima a dadduma pay a gakat ti naaprobaran iti maikatlo ken maudia a pannakaibasana ket ti SB 890 wenno ti Government Optimization Act; SB 2805 wenno ti Movie and Television Review and Classification Board Act; SB 2960 wenno ti Lifelong Learning Development Framework Act; SB 2974 wenno ti Expanded Philippine Science High School (PSHS) System Act ken SB 2975 wenno ti Revised Animal Welfare Act.
