BAGUIO CITY – Nagpirma iti katulagan ti Department of Information and Communications Technology (DICT) ken ti lokal a gobierno ti Baguio para iti panakaipaay ti libre a Wi-Fi wenno internet kadagiti amin nga umili ditoy siudad.
Iti panagbitla ni DICT Secretary Gregorio Honasan, mandato ti ahensia ken paset ti long-term plan dagitoy ti panangipaay ti libre a Wi-Fi connection kadagiti umili.
Kinunana a ti Wi-Fi wenno ti internet connection ket maikonsidera itan kas maysa a kangrunaan a pagkasapulan dagiti pumili para iti access-da iti impormasyon.
Innayonna a maaramat metlaeng ti Wi-Fi para iti baro a wagas ti panagadal dagiti estudyante ken ti online transaction ita a pandemya.
Gapu iti daytoy, pinagyamanan ni Mayor Benjamin Magalong ti panagipaay ti DICT iti libre nga internet connection ditoy siudad.
Kinunana a napateg ti nasao a banag kagiddan iti panakaipatungpal ti SMART City Program ti lokal a gobierno ti Baguio.
