BAGUIO CITY – Maidiaya ti libre nga screening para iti sakit a thyroid sadiay Baguio General Hospital Medical Center (BGHMC) inton sumaruno a lawas, Mayo 21-27 kas paset ti obserbasyon para iti International Thyroid Awareness Week.
Sigun kenni Dr. Dennis Dominguez, Medical Officer IV ti Department of Ears, Nose and Throat ti BGHMC, mangisayangkatda pay iti lecture-fora seknan iti nasao a sakit ken mangipaayda met iti agas kadagiti agkasapulan a pasyente ti nasoa a sakit.
Inlawlawagna a napateg ti thyroid gland gaputa daytoy ti mangpapataud iti sumagmamano a hormones a kasapulan ti bagi para iti metabolismo, panagdakkel ken iti body temperature.
Innayonna a no kurang wenno sobra ti thyroid ti maysa a tao ket adda ti katukad daytoy a kondisyon ti salun-at a mangitunda iti napigsa a panagpitik ti puso, nalaka a panakabannog, namaga a kudil, panaglukmeg ken nalaka a panagturog.
Dinakamatna pay a maysa a rason ti sakit iti thyroid ket ti kinakurang ti iodine.
